قوشقاياسي
گونش دنيزلري سؤکدويو کيمي ميضرابي، يئددي قات گؤيلري سؤکور اوردان کؤوثر دولو بير سبيل آلير آستا- آستا جانين جامينا تؤکور سانکي ياغيش سونو بير گؤي قورشاغي اليني گوللرين باشينا چکير سازي، شهيد قدر تميز- موقدّس، تئليندن دين- ايمان قانيما سکير گول اوزلو شئعريمده (گول)دو بير هئجا کؤنول باغچاسينا گول- چيچک اکير. بو بايرام گؤزل بايرام اولدو. بيزيم بايرام بيزه بايرام گؤروشونه گلدي... نهيه گولورسونوز؟! (بايرام گؤزل بايرام اولدو)، دئديييمه، يوخسا، بايرامين بيزه بايرام گؤروشونه گلدييينه؟. اولسون کي، بيرينجي سؤزوم گولمهلي اولسون!، نهايسه ايکينجي بؤلومه گولمهيين، دوغرودان بايرام بيزه بايرام گؤروشونه گلدي هه ... بابا ...! ، بايرام کيشيزادهني دئييرم. ساغ اولسون، ياخشي گلدي- ياخشي اوتوردوق، ياخشي يئديک- ياخشيجا ايچديک نهدي؟! يئنهده گولورسونوز؟. آ ... ها ... ء ...، بيلديم نهيه گولورسونوز. (يئديک) منظوروم مئيوه- شيريني، فينديق- فيستيق ايدي. (ايچديک) دئديکده، چاي- ماي! دئمک ايستهميشديم. بايرام گلدي، يئييب- ايچديکدن سونرا، دئديم: بايرام ..، آخي .. مثلا ...، بايرامدي، بايرام گؤروشونه گليبسن. او، شيرين سؤزلردن- فيلان ...؟ بايرام، دئدي: آخي ... هانسيني دئييم؟ هاميسيني بيليرسن... دا ... دئديم: سن بير يئريندن باشلا. بيرينجي بو کي، هر بيريسيني دؤنه- دؤنه ائشيتمهيه ارزيشي وار. ايکينجي ده بو کي، بير چوخونو اونوتموشام گئديب ...! بو ياندان دا بيزيم خانيم، سؤزومو کسيب، بويوردولار: بايرامقارداش، بيزيم بو آغاميز، سؤزون دوزونو دئيير!. تزهليکده بير چوخ زادلاري اونودور!. سيز، خاطيرهلرينيزدن بيريني سؤيلهيين. بايرام اوزونو منه توتاراق، دئدي: شبيه چيخارانلارين قضيهسيني دئييم؟. دئديم: هانسي شبيه چيخارانلار؟ بايرام، دئدي: باجي دوغرو دئييرميش!، سن چوخ اونوتقان اولوبسان. تعزيه اوخويانلارين داستاني کؤيوموزده ديللر ازبريدي. نهتهر اونوتدون؟! محرّمليکده کؤيه گلير، شبيه چيخارارديلار؟! اونلاري دئييرم ... دئديم: ياديما گلمير ... بايرام، دئدي: ياديندا دئييل؟، گئجه ياريسي اوشاقلارنان گئتديک شومورو اؤلدورک؟!، اونو دئييرم ... دا ...! دئديم: منيم ياديما گلمير. آللاه امواتينا رحمت ائيلهسين. من قاتيل- ماتيل دئييلم. شومور- مومور ده تانيميرام!. بايرام، چوخ چابا گؤستردي کي، بلکه منيم ياديما دوشسون، اولمادي! . دئدي: آي باجي، (منظورو بيزيم خانيم ايدي) بير قوروپ تعزيه اوخويانلار وار ايديلار تئز- تئز کؤيلره گلير شبيه چيخارارديلار. هر ايل محرّمليکده گلير بيزيم کؤيده مدرسهدن يوخاري، قاراگؤله دؤنن يئرده چاتيرلاريني قورور، گوندوزلر يان- يؤره کؤيلرده تعزيه اوخويور- گئجهلري ده اؤز چاتيرلاريندا سووارديلار. او نئچهگون محرّمليکده خالقي او قدر آغلادارديلار کي، کؤيده ياشايان هر کسي گؤروردون، گؤزلري قيپ- قيزميزي اولاردي. چوخدا کي آغلايانلارين يوزده دوخساندوققوزو، محرّملييي الده بهانه ائديب اؤز دردلرينه آغلايارديلار!. منده کي کيمسهنين آغلاماغيني گؤرمهيه دؤزمزديم، اؤزلليکله آنامي آغلار گؤردوکده، اورهييم اوزولور- قيريلير، سانکي،دونيا باشيما آوار اولاردي، شبيه اوخويانلارين اليندن زارا گلميشديم!. بير گون بيزيم بو منوشا!، دئديم: منوش، گل بير تهر بو شبيه چيخارانلاري کؤيدن چيخاراليم. منوش، دئدي: اده ...!، سن لاپ بئيله کافر اولوبسان؟!. شبيه چيخارانلاري کؤيدن چيخارماق اولار مي!. هئچ اونلارا سايغيسيزليق اولار مي؟! يوخسا بوندان دا داها پيسگونه قالماغيميزي ايستهييرسن؟ بو، چوخ بؤيوک، همي ده باغيشلانيلماز بير گوناه اولار. دئديم: بيرينجي، (اده ...) اؤزونسن!، ايکينجيسي ده، منوش هاچاندان بري سايغي- مايغيني باشا دوشور؟ اوچونجو ده کي، بونلار، تکجه منيم آنامي يوخ، بوتون بؤلگهنين آناسيني آغلاتماغا قرار وئريبلر. آنجاق، منوش دا منيم سؤزومله راضيلاشدي، دئدي: بير گئجه گئديب چاتيرلاريني اودا چکيب- آنالاريني آغلار قوياليم؟. دئديم: نه او کي، باياقدان دئييردين گوناهدي، نه بو کي، دئييرسن: چاتيرلاريني اودا چکهليم!. هئچ فيکيرلهشيرسن، چاتيرلار اودا چکيلسه، اونلارين جانلاري- ماللاري تهلوکهيه دوشر؟. يوخ، من بونا راضي دئييلم. بير نقشه ايشلهيهليم کي، فقط کؤيدن قاچماغا مجبور اولسونلار. چوخ فيکيرلشديکدن سونرا، منوش، دئدي: بير يول تاپديم!، اؤزو ده ايکي باشلي ثاواب!. اگر بير يول تاپيب بو، باجيسي ... ! شومورو اؤلدورسک، هم خالق آغلاماقدان قورتولورلار همي ده آغاميزين اؤجونو بو کؤپئياوغلو- کؤپک شوموردن آلميش اولاريق. دونيادا ثاواب!- عوقبادا ثاواب ! گئتديک، عاغيللي- باشلي(!) اوشاقلاردان دا بير نئچهسيني يولا گتيرديک!. گئجهنين سون چاغلاريندا کؤيلولر يوخلاميش بير زاماندا ، مدرسهنين دیواريندان بويلانيب باخديق- گؤردوک بالاجا چاتيرلارين هاميسينين چيراغي سؤنوکدور. نهايسه بؤيوک چاتيردان کي اونلارين يئييب- ايچمک يئرلري ايدي ايشيق گلير. شومورون چاتيريني اؤنجهدن نيشانلاميشديق. ياواشجادان مدرسهنين ديواريندان آشديق، هر کسين ده الينده اوراقدان- دهرهدن- بيچکدن- تييهدن! فيلان ...، شومورون چاتيرينا ياخينلاشديق. منوش چاتيرين قاپيسي دئييلن يئرين پردهسيني آرالاديقدا، گؤردوک يورغان- دؤشک يئرده، بوش! نهايسه شوموردن خبر يوخ. دئديم: اوشاقلار، اولسون کي بونلار هاميسي او چيراق ايشيغي گلن بؤيوک چاتيردا اوتوروبلار. ياوشجادان چاتيرا ياخينلاشديق، بيز چاتيرين ايچيني گؤروردوک، چؤل قارانليق اولدوغوندان اونلار بيزي گؤرموردولر. چاتيردان کاسئتده- ضبطصوتدا اوخويان بير آروادين سسي گليردي. ناواردا اوخويان آروادين ديليني باشا دوشموردوک، نهايسه فارس لهجهسي کيمي بير لهجهده، چوخدا قيرجانا- قيرجانا! اوخويوردو!. هر دؤنه آروادين سسي کسيلديکده شبیه چیخارانلارين هرهسي بير سؤز دئييرديلر. بيري، دئدي: جا ا ا ا ... ن ... سسيني يئييم!... ديگر بير سس، دئدي: جا ااا ... ن ... جانيني ... يئييم!... يئنه ده آرواد(کاسئت) اوخودو. بو دؤنه آروادين سسي کسيلديکده، اونلارين بيريسي، دئدي: جا ااا ... ن ... ديلي ... ني ... يئييم!... آنجاق، نؤوبهيله، دؤنه- دؤنه هرهسي ناوارداکي آروادين بير يئريني يئييرديلر!، گولوردولر!... شومور ، اوزونو يولداشلارينين هاميدان آغ ساققال اولانينا، شبيهده ده آغا اولانا توتوب، دئدي: عموغلو، باغيشلا، سنين يانيندا آغزيميزدان بو پيس سؤزلر چيخير! او دا، شوموره، دئدي: آي بالام، سيز ايشيزده اولون !! سونرا دا اؤز- اؤزونه، دئدي: گؤرن؟! بيزيم بو باباميز آداما! دئين يوخدو: آخي سن؟ اکينچييدين؟! خيرمانچييدين؟!، آخي! بوغدا نهيينه لازيم؟! ائربئله نئيمتلر اولان يئرده! گئتدين او زههر- ماهار! بوغداني تيخدين؟! بيزي بو گيريف دونيادا- گيريفدار ائلهدين- بير لوقما چؤرکدن اؤترو بو قدر زحمتلرله توشباتوش ائلهدين؟!. سونرا دا، آرتيردي: گونچيخاندان گئجهيهجن بوغازينيزي چيرمالاييب! تر تؤکوبسوز!. ايندي کي باشا بئش باش چکيب حالا گليبسيز!، کئفيزده اولون... بايرام، نفسيني دريب- يئني بير ائنئرژي آلديقدان سونرا، دئدي: مني باغيشلايين، ياديمدان چيخميشدي! دئمهديم. شبيه اوخويانلار هاميسي دؤوره اوتورموشدولار، قاباقلاريندا کؤمورلري قيزارميش بير مانقال وار ايدي! ايکي دنه ده بابامين تنمهکي! چوبوغو کيمي، شئي اللرينده دولانيردي. او تنمهکي، چوبوغو کيمي شئيلري نؤوبهيله سوموروردولر!. اوشاقلاردان هئچ بيريسي بيلمهدي اونلارین سوموردوکلری نهدیر . منوشدان سوروشدوم: بو نهتهر چوبوقدو؟ بونلار چکيرلر؟! منوش، دئدي: ايشين اولماسين، سسيني ده چيخارما، بونلارين چکدييي چوبوق دئييل، تيريههدي- تيريهههک!!. تئز جومون گئدههک!!. دئديم: هارا گئدک؟! مگر شومورو اؤلدورمک اوچون گلمهديک؟، اونوتدون کي دئييردين: دونيادا ثاواب!- عوقبادا ثاواب! منوش، دئدي: نه ثاواب- ماوابي؟! نه شومور- مومورو؟! کورسان مي؟ گؤرمورسن، اونلار بيري- بيرييله قوهومدولار- يولداشديلار؟! . هرهسي ده اؤز کئفلرينده؟! ... ٭٭٭ بايرام داستانا سون قويدو. ائويميزده بايرامين داستانينا گولن دن اولدو، گولمهين ده!. اوزومو بايراما توتوب، سوروشدوم: بايرام...؟ ... ، آنجاق ....، بيلمهديم، بيز بو دونيانين الينده اويونجاق اولدوق، يوخسا بو دونيا بيزيم اويونجاغيميز اولدو؟! بايرام، دئدي: من ده بيلميرم ...!. نهايسه، بير قونونو کسينليکله بيليرم. بو کي، بوراسي اويون بازاريدير ...... اوغوز بايراميميز بوتون ائللريميزه موبارک اولسون .................................................................. وولقانلاري قدحيمه، عقلين بالدير- فيكرين چيچك دوردورانماز بو قيش مني آزرائللي دوزه- دوزه، آتش بابامیز یانیر توپراق آنا اویانیر یاشیل یاز قیزی گلیر چؤل، چیچهيه بویانیر يوخلاما ميشيل- ميشيل گون دوغور ايشيل- ايشيل قيش بايرامليق گئيينيب ياز گلير ياشيل- ياشيل قونوقلار گلير يول- يول برکت ايسه بول- بول شييه- شيکايهلر يوخ، دوستلوق اوزانير قول- قول نهياخشي كي اورهيينله گليب ده، مسكن سالدين اورهييمين ايچينده ياخشي تاپديم ايتيرديييم اؤزومو اؤلهجكديم يالنيزليغين هئچينده سئوينديردين دامار- دامار قانيمي چيچك- چيچك مست ائيلهدين جانيمي سئوگي- سئوگي آلدين دؤرد-بير يانيمي سني سئچديم، گؤزللييي سئچنده آزرائللي قوخويورسا سئوگيني هئجا- هئجا توخويورسا سئوگيني شئعير- شئعير اوخويورسا سئوگيني سني گؤرور ميصراعلارين ساچيندا.
پرده- پرده یئنير، گلير آشاغي
آنا لايلاسيدي سازينداکي سس
"حسين اسدي"يميز اوجادير- اوجا
سوزورمسه، سن اؤيرتدين
اوكيانلاري بيرنفسه،
اوزورمسه، سن اؤيرتدين
گؤستريشين دوغرو- گرچك
يئلكنلرده ايپك- ايپك،
گزيرمسه، سن اؤيرتدين
يورا بيلمز ياغيش مني،
سئودا آدلي يوخوش مني،
دؤزورمسه، سن اؤيرتدين
شئعيرلري يازا- يازا،
من اونلاري تئللي سازا،
دوزورمسه، سن اؤيرتدين.
| Design By : Pichak |
